ცოტა რამ ყავის შესახებ

⦁ მსოფლიოს შვიდი ყველაზე ბედნიერი ქვეყანა: ფინეთი, დანია, შვეიცარია, ისლანდია, ნორვეგია, ნიდერლანდები, შვედეთი;

⦁ ქვეყნები, სადაც კაცზე ყველაზე მეტ ყავას მოიხმარენ: ფინეთი, ნორვეგია, ისლანდია, დანია, ნიდერლანდები, შვედეთი, შვეიცარია.

დღეში რამდენიმე ფინჯანი ყავის მირთმევა ბედნიერების გარანტი არ არის, მაგრამ თუ ასე ჯერ კიდევ არ იქცევით და თუ თქვენი ჯანმრთელობის მდგომარეობა გაძლევთ ამის საშუალებას, სცადეთ, განა პირველად ახლა იგებთ, რომ წარმატების საიდუმლო პატარა ჩვევებია, რომლებიც ყოველდღიურ რუტინად უნდა აქციოთ. ყავის რიტუალი ერთ-ერთი მათგანია. რა თქმა უნდა ამას ობიექტური მიზეზიც აქვს სახელად კოფეინი, რომელიც თავს უფრო ბედნიერად გაგრძნობინებთ და თუ თამამი გადაწყვეტილებების მიღების ინიციატივასაც გამოიჩენთ, მთლიანობაში ცხოვრების ხარისხი გაგიუმჯობესდებათ.
ყველასათვის ცნობილია, რომ კენკროვანი მცენარეები საუკეთესო სამკურნალო თვისებებით გამოირჩევა, მაგრამ ბევრმა არ იცის, რომ ყავაც ხილია, რომლის სამშობლოდაც ეთიოპიას მიიჩნევენ. დღეს ყავა მოჰყავთ 50-ზე მეტ ქვეყანაში: ბრაზილია, კოლუმბია, გვატემალა, კოსტა-რიკა, მექსიკა, პუერტო-რიკო, კენია, ეთიოპია, იემენი, ინდონეზია, ვიეტნამი და სხვა.
ყავის 120-მდე სახეობა არსებობს, რომელთაგან 2 მთლიან კომერციულ ბაზარს ქმნის: ყავის წარმოების დაახლოებით 70% არაბიკაზე მოდის, ხოლო დანარჩენი 30%-ს რობუსტაზე. ამ უკანასკნელს არომატულ არაბიკასთან შედარებით მეტი სიმწარე დაჰკრავს და დაახლოებით 60%-ით მეტ კოფეინს შეიცავს. ის ძირითადად ხსნადი ყავის გამოსაყვანად იხმარება, ასევე რობუსტასთან ერთად სხვადასხვა ბლენდის მისაღებად. რობუსტას უფრო მეტი მოსავლიანობა აქვს და უფრო იაფი ჯდება მისი მოყვანა, ამიტომ, არაბიკას მარცვლები შედარებით ძვირია.
მარცვლის ჯიშისა და წარმოშობის გარდა „არაბული ღვინის“ გემოს მარცვლის დამუშავების და მოხალვის ტექნოლოგია, დაფქვის დრო და ხარისხი განსაზღვრავს. პროცესინგი (მარცვლის დამუშავება) მშრალი (ნატურალური) ან სველი წესით ხდება. პირველის დროს მოკრეფილ მარცვლებს სწორ ზედაპირზე ყრიან გასანიავებლად და მზეზე აშრობენ, სველი დამუშავებისას კი მარცვლის გასუფთავება წყალში ხდება, სადაც ტოვებენ რამდენიმე საათის ან დღის განმავლობაში, ფერმენტაციის შემდეგ კვლავ წყალში ავლებენ და ჰაერზე აშრობენ. ამ გზით ძლიერი კონსისტენციის ყავა მიიღება მომატებული მჟავიანობით, ხოლო თუ უფრო მრავალფეროვანი გემო გირჩევნიათ ხილის ნოტაზე, მშრალი დამუშავებით მიღებული მარცვალი აირჩიეთ.
ყავის მოხალვა ხელოვნებაა. ნუ გიკვირთ, რომ საქართველოდან ყავა ექსპორტზე გადის. საბედნიეროდ ჩვენთანაც არიან კომპანიები, რომლებიც პროფესიონალი ტექნოლოგების ექსპერიმენტული შრომით უნიკალურ რეცეპტებზე გავიდნენ და მსოფლიოს არაერთ ქვეყანაში საქართველოში მოხალული ყავა გააქვთ. რაც უფრო დიდხანს იხალება ყავა, მით უფრო იზრდება სიმწარე და მცირდება მჟავიანობა. თქვენ რომელი გირჩევნიათ? მუქი, საშალო თუ ღია მოხალვა?
იყო დრო, როცა მხოლოდ თურქული ყავა გვეგონა ყავა. მეორე ხსნადი ყავის არსებობის შესახებ გავიგეთ, შემდეგ ესპრესო, კაპუჩინო, ფრანგული პრესი, ირლანდიური ყავა, მოკა, V60, იმდენი ყავის სახეობა და ყავის მომზადების მეთოდი არსებობს, რომ შეიძლება ცოტა დავიბნეთ, რომელიმე კომპანიის მიერ შემოთავაზებული კაფსულის აპარატი გვეჩვენოს მარტივ გამოსავლად და შევიძინოთ, მაგრამ მერე აღმოვაჩინოთ, რომ აქაც საქმე განსხვავებულ ზომებთან გვაქვს და დავრჩეთ ერთი მომწოდებლის ამარა. ამიტომ, არ იჩქაროთ გადაწყვეტილების მიღება, თუ მეტი ინფორმაცია გჭირდებათ, მოგვწერეთ და გიპასუხებთ, როცა დროს გამოვნახავთ.
თითოეულ საკითხზე და დანარჩენ დეტალებზე, რომლებზეც ჯერ არ გვისაუბრია, უახლოეს მომავალში ცალკე სტატა დაიწერება. თვალი ადევნეთ ჩვენს ბლოგს და დაწერეთ კომენტარებში, რა იქნებოდა თქვენთვის საინტერესო თემა.