ასე ეწოდება საპორტო ქალაქს იემენში, რომელიც XV-XVIII საუკუნეებში ყავით ვაჭრობის მთავარი ადგილი იყო. ეს macchinetta del caffè (ყავის აპარატი იტალიურად) 1933 წელს იტალიელი ინჟინრების ლუიჯი დე პონტის და ალფონსო ბიალეტის მიერ შეიქმნა. ეს ოჯახი თითქმის საუკუნის შემდეგაც ამ პროდუქტის ყველაზე ცნობილ მწარმოებლად გვევლინება. მათ ლოგოზე გამოსახული “l’omino coi baffi” (კაცი ულვაშით) ალფონსოს შვილი, რენატოა, რომელმაც მოკას ცნობადობის ზრდაში მნიშვნელოვანი როლი ითამაშა. ის 2016 წლის 11 თებერვალს, 93 წლის ასაკში გარდაიცვალა. მისი ფერფლი სამგლოვიარო ცერემონიისას სწორედ მოკაში მოათავსეს.

მოკა არის იტალიური კულტურის ნაწილი, რომელიც, როგორც ამბობენ, 10-დან 9 იტალიურ ოჯახში მოიპოვება. XX საუკუნის საუკეთესო იტალიურ გამოგონებათა ათეულში შესვლა და მისი დიზაინის შედევრად აღიარება, ალბათ, საკმარისი არ აღმოჩნდება, რომ ის თქვენს სამზარეულოშიც მოხვდეს. მაშ, რით არის გამორჩეული მოკა და რატომ უნდა აირჩიოთ ის თუ მთელი ცხოვრება ხსნადი ან თურქული ყავის იქით არ გაგიხედავთ და ახლა კარგი ყავის გემოს ეძებთ? მოკლედ რომ ვთქვათ იმიტომ, რომ მოკა არის კომპაქტური და სხვა ალტერნატივებთან შედარებით ეკონომიური ყავის მადუღარა, ესპრესოს მსგავს ინტენსიურ, ძლიერ ყავას მარტივად და მცირე დროში მოგიმზადებთ.

მიუხედავად იმისა, რომ პროცესი მარტივია, მაინც მთავარია პრაქტიკა და რაც არ უნდა კარგად აგიხსნათ ყველაფერი, სასურველ შედეგს მხოლოდ რამდენიმე მცდელობის შემდეგ მიიღებთ. მოკასთვის რეკომენდირებულია გამოვიყენოთ საშუალოზე მუქი და მუქი მოხალვის ყავის მარცვლები, რომლებიც არც ძალიან წვრილად უნდა იყოს დაფქვილი და არც კლასიკურად საშუალოდ.

თავად მადუღარა 3 ნაწილისგან შედგება: ქვედა ნაწილში ვასხავთ წინასწარ გაცხელებულ წყალს; ვაფარებთ მეორე, ფილტრიან ნაწილს, სადაც უკვე დაფქვილი ყავა უნდა ეყაროს და ბოლოს ვამაგრებთ ზედა ნაწილს (ფრთხილად იყავით, ხელი არ დაიწვათ თუ ქვედა ნაწილში ცხელი წყალი გისხიათ), რომელიც რა თქმა უნდა სუფთა უნდა იყოს ყოველი მომზადებისას. დადგით გამაცხელებელზე და დატკბით იმის ცქერით, თქვენი ყავის გეიზერი როგორ იფრქვევა.

რას ელოდებით? იხილეთ გეიზერული ყავის მადუღარების არჩევანი ჩვენთან და აირჩიეთ, რომელიც თქვენს სამზარეულოს ყველაზე მეტად მოუხდება. მოკათი მომზადებულ ყავას ძალიან უხდება რძე. ჩვენი რჩევაა, მოკათი ყავის მომზადებისას რძე ფრანგული პრესით ააქაფოთ და სრულყოფილი სახე მიცეთ თქვენს ყავას!

ცილინდრის ფორმის პატარა კაფსულებში მოქცეული წვრილად დაფქვილი ყავა ზუსტი გრამაჟობით და ალუმინის ფოლგით ჰერმეტიზებული, რომელიც ფორმატის მიხედვით განსხვავებულ ზომებში, გემოთი და მასალით იწარმოება. ყავის კაფსულების გლობალური ბაზრის ძირითადი მოთამაშეები არიან: Nespresso, Keurig, Gloria jean’s Coffees, Nescafe (Nestle), Lavazza, Starbucks, Bestpresso, Kissmeorganics, Gourmesso და სხვა. $4 მილიარდიანი და სწრაფად მზარდი ბაზრის ისტორია 1986 წელს დაიწყო, როცა თანამშრომლის ერიკ ფავრეს იდეას კომპანია Nestle-ს ხელმძღვანელობამ შანსი მისცა. მოგვიანებით საოფისე პროდუქტის მარკეტინგული პოზიციონირება შეიცვალა და ის გახდა ყველასათვის ხელმისაწვდომი საშუალება იმისთვის, რომ პროფესიონალურად მომზადებული ესპრესო სახლშიც დააგემოვნონ. გაჩნდა ახალი პატენტები და ბრენდებს შორის გაჩაღდა კონკურენცია, გაიზარდა არჩევანი და ძალიან რთული გახდა იმ კომფორტზე უარის თქმა, რასაც ყავის კაფსულა გვთავაზობს.

ყავის კაფსულების დიდი ნაწილი ალუმინისგან და პლასტმასისგან მზადდება, ეს მასალები არ არის ბიოდეგრადირებადი და ზიანს აყენებს გარემოს. ამრიგად, პასუხისმგებელი ხელისუფლებები და საზოგადოება, რომლისთვისაც მნიშვნელოვანია გარემოსთვის მიყენებული ზიანის შემცირება, მაგრამ, ამასთანავე ახალი პროდუქტით მიღებული კომფორტიც, უბიძგებენ ყავის კომპანიებს, იმუშაონ ახალი, ინოვაციური, ბიოდეგრადირებადი მასალის შექმნაზე, რაც საშუალებას მისცემს მათ, რომ ყავას ხარისხი და გემოვნური თვისებები კაფსულაშიც შეუნარჩუნონ. ასეთი პროდუქტი უკვე არსებობს და ჩვენს ინტერნეტ მაღაზიაშიც ხელმისაწვდომია.

უკვე წაიკითხეთ ჩვენი სტატია „ხსნადი თუ დაფქვილი“? მაშინ არ გაგიჩნდებათ კითხვა, თუ საერთოდ რა საჭიროა ყავის კაფსულა, რადგან ის აერთიანებს ამ ორივე პროდუქტის დადებით თვისებებს და თქვენ შეგიძლიათ რამდენიმე წამში სწორად მოამზადოთ ესპრესო ღილაკზე თითის ერთი დაჭერით.

თუ ყავის აპარატის ყიდვა გადაწყვიტეთ ფასი ის კიდევ ერთი დიდი უპირატესობაა, რომელიც კაფსულის აპარატს მარცვალზე მომუშავე ყავის აპარატთან შედარებით გააჩნია, მაგრამ კაფსულის ფასიდან გამომდინარე თითო ჭიქა ყავა შეიძლება უფრო ძვირი დაგიჯდეთ. თუ მაინც კაფსულის აპარატზე შეაჩერებთ არჩევანს, უნდა გადაწყვიტოთ, რომელი სტანდარტის კაფსულის აპარატი გინდათ, მაგალითად Nespresso®, Lavazza BLUE®, Caffitaly®, Nescafe Dolce Gusto® თუ სხვა. თქვენი არჩევანი შეიძლება დამოკიდებული იყოს იმაზე, თუ როგორი ყავა გიყვართ, თუმცა გეტყვით, რომ კაფსულებში ყველაზე გავრცელებული ფორმატია 37 მმ. დიამეტრის მქონე ევროპული კაფსულები, იგივე Nespresso®. შესაბამისად, თუ შეიძენთ ნესპრესოს სტანდარტის ყავის აპარატს, მაგ შემთხვევაში ყავაში დიდი არჩევანი გექნებათ და ერთი მომწოდებლის პროდუქციაზე არ იქნებით დამოკიდებული.

დანარჩენ სტანდარტებს სხვა სტატიებში განვიხილავთ, მანამდე კი შეავლეთ თვალი ჩვენს ინტერნეტ მაღაზიაში წარმოდგენილ Nespresso®-ს სტანდარტის ყავის კაფსულებს და შეუკვეთეთ თქვენთვის სასურველი.

ხსნადი ყავა დავლიოთ თუ დაფქვილი? თუ თქვენთვის მთავარია ფასი, დრო და სიმარტივე, ალბათ ხსნად ყავაზე შეაჩერებთ არჩევანს, ხოლო თუ თქვენთვის მნიშვნელოვანია, რომ პროდუქტი იყოს ნატურალური, არომატული და ხარისხიანი, მაშინ გირჩევთ, მარცვალი აირჩიოთ. ცალკე სტატია მიეძღვნება ყავის კაფსულას, რომელიც დაფქვილ ყავას უბრუნებს დროისა და სიმარტივის უპირატესობას, მაგრამ თან ახლავს ისეთი დიდი უარყოფითი თვისება, როგორიცაა გარემოსადმი მიყენებული ზიანი, რაც შესაფუთი მასალების დამსახურებაა.

ყავას რომ არაერთი სარგებელი მოაქვს ვიცით, მაგრამ ყველა ყავა სასარგებლოა? აღმოჩნდა, რომ ანტიოქსიდანტების რაოდენობა ორივე ყავაში თითქმის თანაბარია. ხსნადი ყავის შემთხვევაში მცირე ჩამორჩენა გვაქვს ვიტამინებსა და მინერალებში. მთავარი განმასხვავებელი ნიშანი ამ მხრივ კალიუმია, რომელსაც დაფქვილი ყავა თითქმის ორჯერ მეტი რაოდენობით შეიცავს, ვიდრე ხსნადი.

კოფეინის შემცველობაშიც გარკვეული სხვაობა გვაქვს. 1 ჭიქა ხსნადი ყავისგან მომზადებულ სასმელში საშუალოდ 30-90 მგ კოფეინია, დაფქვილი ყავის შემთხვევაში კი 60-დან 180 მგ-მდე. ასეთი სურათი გვაქვს მიუხედავად იმისა, რომ რობუსტას ყავის მარცვალი, რომელსაც ხსნადი ყავის მისაღებად იყენებენ, არომატულ არაბიკაზე თითქმის 60%-ით მეტ კოფეინს შეიცავს. მნიშვნელოვანია ვიცოდეთ, რომ ხსნადი ყავა ნატურალური ყავის ექსტრაქტისგან მიიღება და დამუშავების პროცესში ხშირად ხელოვნურ დანამატებს ურევენ, რის გამოც მავნე ნივთიერებების შემცველობის ალბათობა ასეთ ყავაში დაფქვილთან შედარებით თითქმის ორჯერ უფრო მეტია

ვაღიაროთ, ერთ-ერთი მთავარი მიზეზი, რის გამოც ხსნად ყავაზე ვაჩერებთ ხოლმე არჩევანს სასმელის რაოდენობაა, ყავის სმის პროცესი ხომ სასიამოვნო რიტუალია, რომელიც ასე ძალიან გვინდა, რომ დიდხანს გაგრძელდეს. თუ სრულფასოვნად გსურთ ყავის არომატის შეცნობა, ნატურალური ყავის მომზადების არაერთი მეთოდი არსებობს, რომლებზეც სხვა სტატიებში ვისაუბრებთ და გირჩევთ გაეცნოთ მათ. ნატურალური ყავის მომზადებაც სასიამოვნო რიტუალია, რომელიც უფრო მეტ დროს მოითხოვს ვიდრე ხსნადი ყავის გაკეთება, მაგრამ როგორც ერთ-ერთი ქართული ანდაზა გვეუბნება – ვინც მოითმენს, ის მოიგებს!